2025 жылы Банк «жасыл» ипотекалық кредиттеуді дамытуға 14,73 млрд теңге көлемінде меншікті қаражатын бағыттап, тұрақты қаржыландыру қағидаттарына стратегиялық бейілділігін растады.

Банк Қазақстанда «Жасыл ипотека» бағдарламасын дамытуға және тұрақты құрылысты ілгерілетуге қосқан үлесі үшін «Маңызды серіктестік» номинациясында Green Awards 2025 салалық марапатына ие болды. Марапат KazGBC тарапынан Green Build Central Asia 2025 мерейтойлық форумы шеңберінде табысталды және Банктің энергия тиімді шешімдерге, саланың экологиялық стандарттарына және «жасыл» үйлерге сұранысты қалыптастыруға бағытталған стратегиялық тәсілін растайды.

Экологиялық саясатты іске асыру шеңберінде Банк филиалдық желімен бірлесіп көгалдандыру іс-шараларын өткізді. Есепті кезеңде 270 ағаш отырғызылды, бұл көміртегі ізін азайтуға және қолайлы қалалық ортаны қалыптастыруға ықпал етеді.

Есепті жыл ішінде Банкте өнімдік желіні дамыту және кеңейту бойынша белсенді жұмыс атқарылды, оның ішінде:

– «Наурыз» бағдарламасының жаңа бағыттары іске қосылды: өнеркәсіп, құрылыс, энергетика, көлік, ауыл шаруашылығы және су ресурстары салаларының жұмыскерлерін қамтитын «Наурыз жұмыскер» және тұрғын үй төлемдерін алушыларға арналған «Наурыз Әскери».

- Жетісу облысы әкімдігінің қолдауымен өңірдің әлеуметтік және экономикалық өміріндегі негізгі салаларда жұмыс істейтін мамандарды, атап айтқанда білім беру, денсаулық сақтау, мәдениет, спорт, энергетика және бұқаралық ақпарат құралдары өкілдерін қолдауға бағытталған «Маман» өңірлік бағдарламасы іске қосылды.

- Алматы облысы әкімдігінің қолдауымен әлеуметтік сала қызметкерлері мен мемлекеттік қызметшілерді қолдауға бағытталған «Алатау» өңірлік бағдарламасы іске қосылды. Бағдарлама денсаулық сақтау, білім беру, мәдениет, спорт, энергетика, коммуналдық шаруашылық, әлеуметтік сала қызметкерлерін, сондай-ақ мемлекеттік қызметшілерді қамтиды. Тұрғын үй төлемдерін алатын күштік құрылымдар қызметкерлері бағдарламаға қатыспайды.

- Ақмола облысы әкімдігімен сыйақы мөлшерлемесі жылдық 2%-дан және 5%-дан аспайтын жеңілдетілген ипотекалық қарыздар беру жөніндегі пилоттық жоба шеңберінде ынтымақтастық туралы келісімге қол қойылды.

- 2025 жылғы 10 қаңтардан бастап «Мемлекеттік білім беру жинақтау жүйесі мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» Қазақстан Республикасының Заңы күшіне енді. Оның шеңберінде «Келешек» бірыңғай ерікті жинақтау жүйесі енгізілді, ал Банк оның уәкілетті операторларының бірі болып табылады. «Келешек» жинақтау жүйесі аясында 2025 жылы 5 жасқа толатын балаларға бастапқы білім беру капиталы есептеледі.

- Тұрғын үй төлемдерін алушылар үшін «Әскери баспана» бағдарламасы бойынша алдын ала тұрғын үй қарыздарын беру қайта басталды. Бағдарлама бұрын «Жаңа баспана» / әскери өнім деп аталған.

2025 жылдың басында Банк 2024 жылдың қорытындысы бойынша Қазақстан Республикасы Ұлттық қорынан қазақстандық балалардың шоттарына қаражаттың есептелуін қамтамасыз етті. Жалпы Қазақстан Республикасының 129 279 баласының шотына 22 270 мың АҚШ доллары есептелді.

2025 жылғы 24 мамырдан бастап Банк ұлттық даму институты мәртебесінде «Тұрғын үй саясатын реформалау мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» Қазақстан Республикасының Заңына сәйкес тұрғын үйге мұқтаж Қазақстан Республикасының азаматтары мен қандастарды «Тұрғын үймен қамтамасыз ету орталығы» электрондық базасында есепке алу бойынша жаңа функцияларды орындауға кірісті. 2025 жылғы тамызда Банк жергілікті атқарушы органдардан және «Concordia» ЖШС-дан кезекте тұрған азаматтардың бірыңғай республикалық базасын қабылдауды аяқтап, деректерді орталықтандырылған түрде біріктіруді қамтамасыз етті. 2025 жылдың соңындағы жағдай бойынша тұрғын үйге мұқтаж ретінде есепте 1 008 152 адам тұрды, олардың ішінде 367 953 азамат функциялар берілген сәттен бастап тікелей Банк арқылы есепке алынды. Тұрғын үйге мұқтаж адамдардың тізімдерін түгендеу және өзектендіру жұмыстары тұрақты негізде атқарылады.

Есепті жылы Банк әлеуметтік тұрғын үй бағдарламаларын іске асыру үшін жергілікті бюджеттерден 75,9 млрд теңге тартты.

2025 жылғы ақпанда 2 134 279 қазақстандық Отбасы банктегі шоттарына мемлекеттік сыйлықақы алды. Салымшыларға 2024 жылдың қорытындысы бойынша жалпы 92,9 млрд теңге аударылды.

2025 жыл ішінде KASE алаңында Банктің әлеуметтік облигациялары шығарылымдарын орналастыру бойынша мамандандырылған сауда-саттық өтті. Оның нәтижесінде «Наурыз» тұрғын үй бағдарламасына қатысушыларды кредиттеу үшін 282 млрд теңге тартылды.

2025 жылы Банк Sustainable Fitch халықаралық рейтингтік агенттігі берген ESG-рейтингін «3» деңгейін сақтай отырып, 55-тен 60 балға дейін көтерді. Бағаның өсуі Банктің тұрақты дамуға жүйелі тәсілін, ESG-ақпаратты ашудағы ашықтығын және бизнестің әлеуметтік әсерін көрсетеді. Бұған 1, 2 және 3-қамтулар бойынша парниктік газдар шығарындылары туралы деректерді жариялау, сондай-ақ гендерлік теңдік пен еңбекақы төлеу бойынша көрсеткіштерді кеңейту кіреді.

Есепті жылы Банк Тұрақты даму стратегиясын бекітіп, экологиялық және әлеуметтік тәуекелдерді басқаруға, жасыл қаржыландыруды дамытуға және корпоративтік басқарудың ашықтығын арттыруға бағытталған жүйелі тәсілді орнықтырды. Құжат Банктің жалпы даму стратегиясына кіріктірілген және 2030 жылға дейінгі негізгі ESG-бағдарларды айқындайды.

2025 жылы Банк халықтың қаржылық сауаттылығын арттыруға және жауапты қаржылық мінез-құлықты қалыптастыруға бағытталған білім беру іс-шараларының кешенін іске асырды. 2025 жылғы 31 желтоқсандағы жағдай бойынша мектеп, колледж және университет оқушылары мен студенттері, сондай-ақ ұйымдардың қызметкерлері үшін 957 ашық сабақ пен дәріс ұйымдастырылды. Іс-шараларға 30 993 адам қатысты.

Банк Қазақстан Республикасының Еңбек және халықты әлеуметтік қорғау министрлігімен және ITeachMe қорымен бірлесіп, халықтың әлеуметтік осал топтары үшін тұрғын үй құралдарының қолжетімділігін арттыруға бағытталған онлайн-кездесу өткізді. Қатысушыларға тұрғын үй бағдарламаларының талаптары мен жинақ қалыптастыру мүмкіндіктері бойынша толық түсіндірмелер берілді.