2023 жылдың басынан бастап Банк Қазақстандағы энергия тиімді тұрғын үй кешендерінен тұрғын үй сатып алуға бағытталған алғашқы «жасыл» ипотека бағдарламасын іске асырады. Бұл тұрғын үй кешендері танылған экологиялық стандарттарға сәйкес салынған. Бағдарлама экологиялық тұрақты құрылысты ілгерілетуге, қоршаған ортаға теріс әсерді төмендетуге және азаматтар үшін жайлы әрі қауіпсіз өмір сүру ортасын қалыптастыруға ықпал етеді.

Бағдарламаға қатысудың негізгі шарты - сатып алынатын тұрғын үйдің сертификаттау деңгейіне қарамастан, Қазақстанда қолданылатын жүйелердің бірі бойынша (OMIR, ГОСТ Р, BREEAM, LEED) сертификаттаумен расталған «жасыл стандартқа» сәйкес келуі.

Экологиялық таза құрылыс материалдарын, энергия тиімді шешімдерді қолдану, аумақтарды абаттандыру және көгалдандыру, ұтымды құрылыс салу, пәтерлердегі микроклиматты реттеу мүмкіндігі және көлік қолжетімділігі клиенттердің өмір сүру сапасын арттыруға және экологиялық ізді төмендетуге жағдай жасайды.

Сондай-ақ осы бағдарлама бойынша Банк сертификаты «Алтын» деңгейінен төмен емес объектілерден тұрғын үй сатып алу немесе жөндеу кезінде халықтың әлеуметтік осал топтары мен әскери қызметшілер үшін төмендетілген кредит мөлшерлемелерін көздейді. Бұл бастама экологиялық ізді қысқартуға ықпал етіп, әлеуметтік әл-ауқатты қолдайды және Банктің клиенттері мен қоғам үшін тұрақты болашақ қалыптастыруға бағытталған.

Бүгінгі таңда Банк Қазақстанның бүкіл аумағында экологиялық құрылыс стандарттарын сақтайтын 25 құрылыс салушымен ынтымақтастық орнатып, олармен меморандумдар жасасты. Банк осы бағыттағы ынтымақтастықты одан әрі белсенді дамытуды жоспарлап отыр.

«Жасыл» ипотека бағдарламасын іске асыру нәтижелері туралы ақпарат келесі кестеде келтірілген:

2025 жылы Банк «жасыл» ипотека бағдарламасын белсенді қаржыландыруды қолдау үшін меншікті қаражатын бөлді. Жыл ішінде Банк өз қаражаты есебінен 14,73 млрд теңгені табысты игерді. Нәтижесінде 2025 жылы осы бағдарлама шеңберінде Банк 570 клиентке 14,73 млрд теңге сомасына ипотекалық кредиттер берді. «Жасыл» ипотека іске қосылған сәттен бастап жалпы сомасы 46,14 млрд теңге болатын 1 825 қарыз берілді. 2025 жылғы 31 желтоқсандағы жағдай бойынша «жасыл» ипотека портфелі 43,2 млрд теңгені құрады, ал оның Банктің жалпы кредиттік портфеліндегі үлесі 1,07%-ға жетті.

Банктің тұрақты құрылысты ілгерілетуге қосқан үлесін мойындау шеңберінде 2025 жылы Банк «Маңызды серіктестік» номинациясында Green Awards 2025 салалық марапатына ие болды. Марапат Қазақстанның жасыл құрылыс жөніндегі кеңесі (бұдан әрі - KazGBC) тарапынан KazGBC-тің 10 жылдық белсенді қызметіне арналған Green Build Central Asia 2025 мерейтойлық форумы шеңберінде табысталды. Форум құрылыс секторының жетекші өкілдерін, девелоперлерді, қаржы институттарын, мемлекеттік органдарды, жоғары оқу орындарын және халықаралық ұйымдарды біріктірді. Оның негізгі оқиғасы тұрақты дамуды ілгерілетуге және ғимараттарды экологиялық бағалаудың ұлттық OMIR әдістемесін енгізуге маңызды үлес қосқан сала көшбасшыларын марапаттау рәсімі болды.

Марапаттың берілуі Банктің тұрақты құрылысты қолдау бойынша толыққанды тәсіл қалыптастырғанын растайды. Бұл тәсілде экологиялық талаптарға сәйкестік тұрғын үйдің сапасы мен қолжетімділігі сияқты маңызды нормаға айналып келеді. Банк командасы құрылыс салушыларға энергия тиімді шешімдерді, заманауи материалдарды және қоршаған ортаға түсетін жүктемені азайтатын ойластырылған жоспарлау шешімдерін енгізуге нақты ынталандырулар беретін орта қалыптастырды.

Банк салалық сарапшылармен және кәсіби бірлестіктермен белсенді өзара іс-қимыл жасайды, OMIR әдістемесі бойынша экологиялық бағалаудан өтетін жобаларды қолдайды, сала стандарттарын арттыруға және болашақ сатып алушылар арасында экологиялық үйлерге сұранысты қалыптастыруға жәрдемдеседі. Нәтижесінде нарықтың мінез-құлқы өзгеріп, девелоперлер жобаларды «жасыл» талаптарды ескере отырып жоспарлай бастады, ал клиенттер энергия тиімділігі мен қалалық ортаның сапасына барған сайын көбірек қызығушылық танытуда.

Отбасы банк кәсіби қоғамдастықтың мойындауын жоғары бағалайды және бұл марапатты елдің тұрғын үй саясаты мен құрылыс экожүйесінде тұрақты тәсілді ілгерілету бойынша өз жұмысының маңыздылығын растайтын белгі ретінде қарастырады. Банк әріптестікті одан әрі дамытып, жобаларға қойылатын экологиялық талаптарды күшейтуді және қауіпсіз, энергия тиімді әрі тұрақты қалалық ортаны қалыптастыруға бағытталған бастамаларды қолдауды жалғастырады.