Отбасы банкінде "Келешек" жүйесі басталған алғашқы тәулікте 1 000 қазақстандық білім беру шоттарын ашты

Баспасөз хабарламасы

5 жастағы Ибраһим Әділбек Отбасы банкінде ("Бәйтерек" холдингінің еншілес ұйымы) "Келешек" жүйесінің Қазақстандағы алғашқы қатысушысы атанды. Ол үшін әкесі Бағдат Ерубаев ұлына "AQYL" білім беру депозитін ашқан.

Енді мемлекет кішкентай қазақстандықтың шотына 60 АЕК немесе 235 920 теңге көлемінде бастапқы білім беру капиталын аударады. Оны сақтап қалу үшін отбасына жыл сайын кемі 24 АЕК немесе 94 368 теңгені аталмыш депозитке аударып тұрулары қажет. Ал Отбасы банк қосымша баланың жинақ шотына банк сыйақысы мен мемлекеттік сыйлықақы есептейтін болады.

- "Келешек" жүйесінің қатысушысы болу үшін "AQYL" білім беру депозитін ашу қажет. Мен оны Отбасы банкінің бөлімшесінде жасадым. Біздің отбасымыз үшін бұл баламыздың біліміне қаржы жинап, оған лайықты мамандық алуға көмектесудің қолжетімді тәсілі. Ұлым оқуға тегін түсіп кетсе де, ол өз жинақтарын үй сатып алуға жұмсай алады, - дейді Бағдат Ерубаев.

"Келешек" ерікті жинақтаушы жүйесіне қатысу үшін Отбасы банкінде 2025 жылдың 12 мамырынан бастап "AQYL" депозитін ашуға болады. Не бәрі бір тәуліктің ішінде 1 000 қазақстандық ата-ана аталмыш салымды өз балаларының атына ашып үлгерген.

- Адамның ең маңызды активі – білім. Қазақстан – "Келешек" бірыңғай ерікті жинақтау жүйесін құру арқылы, балаларының біліміне бағыттаған ата-аналардың инвестициясын қолдап отырған санаулы елдердің бірі. Енді бастапқы капитал бөлінеді. Отбасы банк ұл-қыздарының болашағын ойлаған саналы ата-аналарға білім беру депозиттерін ашуға белсенді түрде көмектеседі. Енді оны otbasybank.kz порталында, бейне-қоңырау бойынша, банк бөлімшелерінде және кеңесшілердің көмегімен іске асыруға болады. Алдағы 10 күнде бұл қызмет Otbasy bank мобильді қосымшасында да қолжетімді болады, - деді Отбасы банкінің Басқарма төрағасы Ләззат Ибрагимова.

Отбасы банкінде "AQYL" білім беру жинақтау салымын ашудың және "Келешек" жүйесінің қатысушысы болудың төрт тәсілі:

1. Otbasybank.kz порталында. Ол үшін жеке кабинетіңізге кіріңіз, "Менің банкім" қойындысын ашып, "Депозиттерге" өту керек. Әрі қарай, "Жаңа депозит" батырмасын басып, "AQYL" салымын ашасыз;

2. hcsbk.kz банк сайтындағы бейне-қоңырау қызметі арқылы;

3. Банк бөлімшелерінде;

4. Кеңесшілердің көмегімен. Сілтеме арқылы өз қалаңыздан кеңесші таңдай аласыз: https://hcsbk.kz/network-agents/.

"AQYL" депозитін ашу үшін клиенттердің жартысынан астамы мобильді әрі клиенттерге ыңғайлы жерде қызмет көрсете алатын банк кеңесшілерінің қызметін пайдаланған. Солардың бірі - Ақмарал Қанағатова. Ол банк кеңесшісімен өз үйінің жанында кездесіп, 5 жастағы ұлына білім беру депозитін ашқан. Бала болашақта дәрігер болуды армандайды екен.

- Мен баламның болашақ білім алуы жөнінде осы бастан қамданғанды жөн санадым. "AQYL" депозиті мен "Келешек" жинақтаушы жүйесі - ұлымың арманын орындауға жақсы мүмкіндік. Мемлекет біз сияқты ата-аналарға осылайша көмектесіп жатқаны қуантады. Бүгінгі бүлдіршіндер – болашақта еліміздің жоғары білікті мамандары, - дейді Ақмарал Қанағатова.

"AQYL" депозитінің шарттары:

- сыйақы мөлшерлемесі 13,58% (ЖТСМ 14,5% бастап);

- мемлекеттік сыйлықақы: салымшылардың барлық санаттары үшін - 5%. Жетім балалар, ата-анасының қамқорлығынсыз қалған балалар, мүмкіндігі шектеулі балалар, көп балалы және аз қамтылған отбасылардан шыққан балалар үшін - 7%.

- депозит ашқан кезде міндетті бастапқы жарнаның мөлшері 3 АЕК немесе 11 796 теңгеге тең (2025 жылы). Жетім және ата-ана қамқорлығынсыз қалған балалар үшін бастапқы жарна жоқ.

Мемлекет балаларға "Келешек" бағдарламасы аясында "AQYL" депозитіне қандай сома аударады?

Бастапқы білім беру капиталы 2025 жылы 60 АЕК немесе 235 920 теңгені құрайды.

Жетім балалар мен ата-анасының қамқорлығынсыз қалған балалар үшін бастапқы білім беру капиталы 2025 жылы 120 АЕК немесе 471 840 теңгеге тең.

2025 жылы мемлекеттен берілетін, 235 920 теңгеден басталатын бастапқы білім беру капиталы биыл 5 жасқа толатын балаларға есептелетін болады.

Отбасы банкінде "AQYL" депозиттері ашылған адамдар не істеуі керек?

2025 жылдың бірінші жартыжылдығында 5 жасқа толатын балалардың ата-аналары 2025 жылдың 15 мамырынан бастап 2025 жылдың 30 маусымына дейін otbasybank.kz порталындағы Жеке кабинетте "AQYL" депозитіне қосымша келісімге қол қоюлары қажет. Бұл жағдайда бастапқы білім беру капиталы қолданыстағы депозитке есептеледі. Ақша 2025 жылдың 31 тамызына дейін түседі.

1 шілде мен 31 желтоқсан аралығында 5 жасқа толатын балалар да биылғы жылы қосымша келісімге қол қоюы керек. Қаражат 2026 жылдың 28 ақпанына дейін түседі.

Қандай жағдайларда мемлекеттен бөлінген бастапқы капитал бюджетке қайтарылады?

Оны сақтау үшін ата-аналар "AQYL" депозитіне балалары кәмелетке толғанға дейін немесе білім беру ұйымына түскенге дейін жыл сайын жарна салып тұрулары қажет.

Бір жылдағы ең төменгі жарна 24 АЕК немесе 2025 жылы 94 368 теңге.

Халықтың әлеуметтік осал топтары санатындағы балалар үшін - 2025 жылы 12 АЕК немесе 47 184 теңге.

Жетім балалар мен ата-анасының қамқорлығынсыз қалған балаларға ашылған "AQYL" депозитіне жыл сайын міндетті жарналар салудың қажеті жоқ.

Мемлекеттен берілген бастапқы капиталды қалай жұмсауға болады?

Бастапқы капитал, ата-аналардың жарналары, банк сыйақысы және мемлекеттік сыйлықақы "AQYL" депозитінде біріктіріліп жинақталады. Бала мектеп бітірген сәтте, бұл соманы Қазақстанда немесе шетелде білім алу ақысын төлеуге қолдануға болады.

Егер депозит ұстаушы білім беру грантын алса, онда диплом алынғаннан кейін депозитте жинақталған қаражатты (банктің капиталдандырылған сыйақысын, мемлекеттік сыйлықақы мен бастапқы білім беру капиталын ескере отырып) келесідей пайдалануға болады:

1) білім беру жинақтау салымында қаражат жинақтауды жалғастыра беруге болады;

2) жинақтарды аға-бауырларға, апа-сіңлілерге, туыстарға, достарға және т.б. беруге болады;

3) білімнің басқа деңгейлі түрлерін алу мақсатында білім беру қызметтеріне ақы төлеуге болады;

4) тұрғын үй жағдайларын жақсарту үшін Отбасы банкіндегі депозитке қаражат аударуға болады.

***

««Отбасы банк» тұрғын үй құрылыс жинақ банкi» АҚ — еліміздегі тұрғын үй құрылыс жинақ жүйесін жүзеге асыратын бірден-бір банк. Ұйым Еуропалық құрылыс жинақ кассалары федерациясына (ЕҚЖКФ) және Халықаралық тұрғын үйді қаржыландыру одағына кіреді. 2022 жылы банк Ұлттық ESG клубының негізін қалаушылардың бірі болды. Банкінің жалғыз акционері – «Бәйтерек» Ұлттық басқарушы холдингі» АҚ.