Алматы облысында «Алатау» бағдарламасына қатысу үшін өтінімдерді қабылдау мерзімі 12 қыркүйекке дейін ұзартылады

Отбасы банк ("Бәйтерек" холдингінің еншілес ұйымы) және Алматы облысының әкімдігі "Алатау" өңірлік тұрғын үй бағдарламасын іске қосты. Ол әлеуметтік сала жұмыскерлері мен мемлекеттік қызметшілерді қолдауға бағытталған. Жаңа бастама өңірдің дамуына және оның тұрғындарының өмір сүру сапасына күн сайын үлес қосатын мамандарға жеңілдікті талаптарда өз тұрғын үйлерін сатып алуға мүмкіндік береді.

«Алатау» бағдарламасын іске асыру үшін Отбасы банк пен жергілікті әкімдік 3 775 200 теңге бөлді.

Бағдарлама денсаулық сақтау, білім беру, мәдениет, спорт, энергетика, коммуналдық шаруашылық, әлеуметтік сала жұмыскерлерін, сондай-ақ мемлекеттік қызметшілерді (тұрғын үй төлемдерін алатын күш құрылымдарының қызметкерлерін қоспағанда) қамтиды.

«Алатау» бағдарламасының талаптары:

• Несиенің ең көп сомасы – 30 млн теңгеге дейін;
  • Бастапқы жарна – 10%-дан басталады;
  • Сыйақы мөлшерлемесі – жылдық 5% (ЖТСМ 5,1%-дан 6,9%-ға дейін);
  • Сатып алынатын тұрғын үй – Алматы облысындағы бастапқы нарықтағы пәтерлер.

Қатысушыларға қойылатын негізгі талаптар:

• Қатысушылардың жасы – 18-ден 60 жасқа дейін;
• Қатысушының және отбасы мүшелерінің меншігінде тұрғын үйдің немесе үлестің болмауы;
• Сатып алу құқығымен жалдамалы тұрғын үйдің болмауы;
• Алматы облысында кемінде 24 ай ішінде міндетті зейнетақы аударымдарымен ресми жұмыс өтілінің болуы.

Іріктеу қалай жүргізіледі?

Өтінімдер Алматы облысының тұрғын үй-коммуналдық шаруашылық және абаттандыру басқармасында қабылданады, ол мына мекенжайда орналасқан: Қонаев қ., Қонаев даңғылы, 7/2, 1-қабат. Өзіңізбен бірге келесі құжаттар болуы керек:

- жеке куәлік;

- белгіленген нысан бойынша несие беруге қағаз түріндегі өтініш;

- жұмыс орнынан еңбек өтілін растайтын анықтама;

- көрсетілген жұмыс өтілі уақытына зейнетақы аударымдары туралы анықтама;

- өтініш берген сәтте Қазақстан Республикасының аумағында өтініш беруші мен отбасы мүшелерінің (жұбайының (зайыбының)), кәмелетке толмаған балаларының меншігінде тұрғын үйдің жоқтығы туралы анықтама;

- спортшылар үшін: әлем чемпионатының, Азия ойындарының чемпионы/жүлдегері мәртебесін растайтын құжаттар;

- балалардың туу туралы куәлігі;

- некені тіркеу туралы куәлік.

Қатысушылар тізімін әкімдіктен тұрғын үй комиссиясы қалыптастырады. Оның өкілдері өтінімдерді балдық жүйе бойынша бағалайды. Неке мен балалардың болуы, еңбек өтілі ескеріледі. Бұдан әрі бағдарламаға қатысушыларға кредиттік өтінім беру үшін Отбасы банкке жолдама беріледі.