Ақсудағы 55 энергетик жеңілдетілген шартпен баспаналы болады

Eurasian Resources Group (ERG) құрамындағы «Еуроазиаттық энергетикалық корпорациясы» АҚ Ақсу электр станциясы мамандарының тұрғын үй жағдайларын жақсартуға бағытталған жеңілдетілген бағдарлама қолға алынды. Оған қатысқан қызметкерлерге Отбасы банкі жылдық 5% үстемемен (ЖТҮС мөлшері 5,2%-дан басталады) займ береді. Энергетиктерден талап етілетін бастапқы жарна межесі – бар болғаны 10%.  
Тәуелсіздік күні мен Ақсу электр станциясының 55 жылдық мерейтойы қарсаңында Павлодар облысы әкмінің орынбасары Дәурен Жамбайбек, Отбасы банкі Павлодар облыстық филиалының директоры Талғат Баилов пен Қазақстандағы ERG-дің Бас директорының қаржы жөніндегі орынбасары Данияр Рахматуллаевтар өзара түсіністік пен әріптестік туралы үшжақты меморандумға қол қойды.

Бағдарламаға мұрындық болғандар оны іске асыруға әр тараптан 300 млн теңге қаражат бөлетін болды. Нәтижесінде оның жалпы бюджеті – 900 млн теңгеге жетеді. Бұл 55 отбасының баспаналы болуына сеп. Осы орайда, мұндай бағдарлама ERG-дің өзге де кәсіпорындары орналасқан Ақтөбе мен Қарағанды облыстарында сәтті іске асырлып жатқанын айта кеткен жөн.  

Үміткерлерді іріктеу барысында «Еуроазиаттық энергетикалық корпорациясы» АҚ-ның тұрғын үй комиссиясы әкімдіктің тұрғын үй кезегіне тұрған мамандарға басымдық береді. Қызметкерлер сатып алатын пәтердің Павлодар облысының Ақсу қаласындағы жаңа немесе екінші нарықтан боларын өздері таңдайды.

– Өнеркәсіптегі алпауыт кәсіпорындарды біріктірген Еуразиялық Топ әрдайым өзінің әлеуметтік жауапты компания екенін айқын аңғыртып келеді, - деді Павлодар облысы әкімінің орынбасары Дәурен Жамбайбек. – «Еуроазиаттық энергетикалық корпорациясы» АҚ Ақсу электр станциясының 55 жылдық мерейтойы қарсаңында біз  қызметкерлерді әлеуметтік қолдау көлемін кеңітіп, электр станциясы мамандарының тұрғын үй жағдайын жақсартуға септесер жаңа үшжақты меморандум жасасып жатырмыз. Бұл бағдарламаның операторы – «Отбасы банкі» АҚ. Ол займды жеңілдетілген шартпен рәсімдеуге жәрдемдеседі.
Бағдарламаға соңғы 5 жыл өзінің және отбасы мүшелерінің атында ҚР аумағында баспанасы болмаған, үйге мұқтаж қызметкерлер қатыса алады.

Іріктеуден өткендер міндетті 10 пайыздық бастапқы жарнаны салған соң, Отбасы банкі оларға 5% үстемемен (жылдық тиімді үстеме ақысы 5,2%-дан басталады) займ береді. Бағдарламаға қатысушы белгіленген межеден қымбат пәтер алғысы келсе, қалғанын жеке қаражаты немесе зейнетақы жарнасынан артылған салымын пайдалана алады.

– «Еуроазиаттық энергетикалық корпорациясы» АҚ Ақсу электр станциясы – елдегі негізгі электр қуатын өндірушілердің бірі. Мұнда өз ісінің шын шеберлері еңбек етіп жүр. Біз оларға жайлы жағдай жасауға тырысамыз. Адамның бақытты болуы үшін, оның өзі үйі әрі сол үйде бақ пен береке болғаны керек. Әр отбасына ырыс пен молшылық тілеймін,- деді ERG Директорлары кеңесінің төрағасы Александр Машкевич.
Соңғы 5 жылда Павлодар облысындағы 650 еуразиялық баспаналы болды. Жалпы алғанда, 2009 жылдан бері ERG қызметкерлерінің қатарындағы 2 мың отбасы тұрғын үймен қамтылған.

– Отбасы банк биыл жалпы саны 60 мыңға жуық займ берген. Тек Павлодар облысында 2 800 отбасы қоныс тойын тойлады. Біз отандастарымыздың баспаналы болуына күнделікті септесеміз. Қазір бұл іске жұмыс берушілер де үлес қосып, жәрдемдескені бізді ерекше қуантады. Соның арқасында тұрғын үйдің шаршы метрі адамдарға қолжетімді бола түсті,- деді Отбасы банктің Павлодар облыстық филиалының директоры  Талғат Баилов. – Енді таяу күндері Ақсу энергетиктері де баспаналы болады. Басында үйі бар адамның ертеңге деген сенімі артып, отбасында тұрақтылық пен береке болады.