Қарағанды облысында «Бақытты отбасы» бағдарламасы бойынша алғашқы несие берілді

Қарағанды облысында «Бақытты отбасы» бағдарламасы бойынша алғашқы несие берілді

26 июля 2019
Қарағанды облысы бойынша алғашқы несие Жезқазған және Шет ауданында тұратын отбасыларға берілді. Олар займды жылдық 2 пайыз мөлшерлемемен 19 жылға дейін алатын болады.

-- Тұрғын үй құрылыс жинақ банкі табысы төмен отбасыларды несиелендіру бағдарламасын іске қосты. Аталған бағдарламаны жүзеге асыру мақсатында банктің есеп-шотына республикалық бюджеттен 50 млрд теңге аударылды. Бұл қаражат 2019 жылы алғашқы 6 000 қазақстандық отбасыға жалдамалы үйден өз пәтеріне көшіп баруға көмектеседі. Арнайы олар үшін Тұрғын үй құрылыс жинақ банкі «Бақытты отбасы» бағдарламасының шарттарын жасау кезінде несие бойынша төлемнің жалдамалы пәтерге кететін төлем мөлшерімен шамалас болуын қамтамасыз етті. Бұған қоса, тұрғын үй құрылыс жинақ жүйесі уақыт өте келе займ бойынша төлемнің төмендеуіне мүмкіндік беретіндіктен, отбасылық бюджетке түсетін ауыртпалық та азаятын болады, - деп атап өтті Тұрғын үй құрылыс жинақ банкінің басқарма төрайымы Ләззат Ибрагимова.

«Бақытты отбасы» бағдарламасына қатысу үшін отбасының әр мүшесіне келетін табыстың мөлшері 42 500 теңгеден аспауы керек (барлық салықтар мен зейнетақы жарналарын шегергенде). Мәселен, егер отбасы 5 адамнан тұратын болса, онда оның жалпы кірісі 212 500 теңгеден артық болмауы тиіс. Яғни, бұл бюджеттік жәрдемақы емес, жұмыс орнынан берілетін қаражат болуы керек.

Бастапқы жарнаны өтеуге шамасы келмеген отбасыларға тек жаңа үйден пәтер сатып алу үшін жергілікті әкімдік тарапынан тұрғын үй сертификаттарын беру қарастырылған. Тұрғын үй сертификаттарын алушылардың тізімін мәслихат бекітетін болады.

--Жергілікті әкімдіктің қызметкерлері жолдама алуға ниет білдірген табысы төмен 500-дей отбасының өтінімін қабылдады. Олар енді осы жолдамамен Тұрғын үй құрылыс жинақ банкіне барып, жеңілдетілген несиені алу үшін несиелік өтінімді бере алады, - деп атап өтті Қарағанды әкімі Нұрлан Әубәкіров.
Қарағанды облысы бойынша «Бақытты отбасы» бағдарламасының жүзеге асырылуы жайындағы толығырақ ақпаратты енді сіз Тұрғын үй құрылыс жинақ банкінің «Қарағанды қаласы, Бұқар Жырау даңғылы, 57/1» жаңа мекенжайында орналасқан бөлімшесінде біле аласыз.

26 шілдеде Қарағанды облысындағы Тұрғын үй құрылыс жинақ банкі филиалының жаңа кеңсесінде «Бақытты отбасы» бағдарламасын таныстыру іс-шарасы өтті. Оған банк клиенттері, құрылыс компанияларының өкілдері, сондай-ақ, жеңілдетілген бағдарлама бойынша займ алу үшін, өз қызметкерлеріне бастапқы жарна бойынша демеушілік көрсетуге дайын кәсіпкерлер қатысты.

Анықтама: Қарағанды облысының әрбір 14-ші тұрғыны болашақ баспаналары үшін қаражат жинақтауда. Ағымдағы жылы тұрғын үй сатып алу мақсатында 1 385 банк салымшысы несие алды.

Жалпы алғанда, банк Қарағанды облысы бойынша 95 441 адамға қызмет көрсетеді. Дәл осынша салымшы Тұрғын үй құрылыс жинақ банкіндегі шоттарында болашақ үйлері үшін қаражат жинауда.


Бұл туралы бөлісіңіз:

ХОТИТЕ УЗНАВАТЬ О НАШИХ АКЦИЯХ ПЕРВЫМИ?!

Қоңырауға тапсырыс беру