«Қазақстандық кәсіпорындардың инвестициялық мақсаттарына бағытталған әрбір 3-ші теңге – «Бәйтерек» холдингінің қаражаты. 2015 жылдың қорытындылары бойынша барлық қазақстандық кәсіпорындардың негізгі капиталына инвестициялар қаржыландыруда Холдингтің үлесі 31 %-ды құрады», - бұл туралы ҚР Парламенті Мәжілісінің Қаржы және бюджет комитеті отырысында «Бәйтерек» ҰБХ» АҚ Басқарма Төрағасының орынбасары Ләззат Ибрагимова мәлімдеді.

«Бәйтерек» холдингі экономиканың шикізаттық емес салаларына ұзақ мерзімді кредит беру үлесін 2013 жылғы 19 %-дан (81 млрд. теңге) 2015 жылғы 40 %-ға дейін (262 млрд. теңге) ұлғайтты. 2013 – 2016 жылдар аралығында экономиканың шикізаттық емес салаларында ірі жобаларды қаржыландыруға «Бәйтерек» холдингіне 365,4 млрд. теңге бөлінді. Ұлттық қор қаражаты 250 млрд. теңгені (214 млрд. теңге игерілді) құрады. Республикалық бюджет қаражаты – 115,4 млрд. теңге (106,5 млрд. теңге игерілді). Өңдеу өнеркәсібінің субъектілеріне кредит беру деңгейі 45 %-ды (216,4 млрд. теңге), энергетика – 16 %-ды (7,5 млрд. теңге), көлік және логистика – 18 %-ды (17,7 млрд. теңге), байланыс – 65% (20,6 млрд. теңге) құрады.

Жоспарлы қуатқа шыққан кезде кәсіпорындар өндірісінің жыл сайынғы өсімі 783 млрд. теңгені құрайды. Бюджетке төленетін салық - 76 млрд. теңге. 3 600 жұмыс орны құру жоспарланады. Бұдан басқа, 2015 жылы экспорттаушыларды қолдауға бөлінген 50 млрд. теңге есебінен шетелге 312 млрд. теңге сомасына өнім сатылды, бұл 2015 жылғы Қазақстанның шикізат экспортының жалпы көлемінің 10 %-ын құрайды.

ҚОЛЖЕТІМДІ ТҰРҒЫН ҮЙ. Қазақстанда берілген үш ипотекалық теңгенің екі теңгесін Холдингтің еншілес ұйымы «Қазақстанның тұрғын үй құрылыс жинақ банкі» АҚ ұсынды, бұл 2015 жылы берілген барлық ипотекалық кредиттердің 63 %-ын құрайды.

2015 жыл мен 2016 жылдың 4 айы ішінде Өңірлерді дамытудың 2020 жылға дейінгі бағдарламасы шеңберінде жалпы алаңы 609 мың шаршы метр 9 675 пәтер енгізілді, соның ішінде «Халықтың барлық санаттары үшін тұрғын үй» бағыты бойынша пайдалануға берілген тұрғын үй 474 мың ш.м. (7 410 пәтер); «Жас отбасы үшін тұрғын үй» бағыты бойынша пайдалануға тапсырылған тұрғын үй 135 мың ш.м. (2 265 пәтер).

Мемлекет басшысының тапсырмасы бойынша 2016 жылы қосымша ҚР Ұлттық қорынан жалдамалы және кредиттік тұрғын үй салуға 113 млрд. теңге және кредиттік тұрғын үй сатып алуға «ҚТҮҚЖБ» АҚ салымшыларына кредит беруге 22 млрд. теңге бөлінді.

«Нұрлы жол» бағдарламасы шеңберінде 2016 – 2017 жылдарға жалдамалы тұрғын үй бойынша жоспар 324,1 мың ш.м., кредиттік тұрғын үй бойынша жоспар – 366,9 мың ш.м. құрайды. Бүгінгі күні 2016 – 2017 жылдары тапсырылатын 268,9 мың ш.м. (4 441 пәтер) салу үшін шарттарға қол қойылды.

Жалдамалы тұрғын үй салу мен сатып алуға «Қазақстандық ипотекалық компания» АҚ бағыты бойынша 2015 – 2016 жылдары Ұлттық қордан 115 млрд. теңге бөлінді.

2015 жылдың қорытындылары бойынша 401 мың ш.м. жоспары кезінде тұрғын үйдің 425,5 мың ш.м. (7 234 пәтер) пайдалануға тапсырылды, шамамен 21 мың жұмыс орны құрылды және сақталды. 2016 жылдың объектілері бойынша 326 мың ш.м. жоспары кезінде 371,9 мың ш.м. (6 521 пәтер) салуға шарттар жасалды (Соның ішінде бүгінгі күні 26,8 мың ш.м. пайдалануға тапсырылды, 345,1 мың ш.м. құрылысы жүріп жатыр).

Бұдан басқа, Холдингтің еншілес ұйымы «Бәйтерек Девелопмент» АҚ-да 431 мың шаршы метрге (7,6 мың пәтер) қосымша жобалар пулы бар.

ШОБ дамыту. Банктер 2015 жылы шағын және орта бизнеске берген кредиттердің 41 % – «Бәйтерек» холдингінің қаражаты.

Холдинг ШОБ-ты 524 млрд. теңгеге қаржыландырды. Холдингтің еншілес ұйымы «Даму» кәсіпкерлікті дамыту қоры» АҚ бағыты бойынша 2013 жылдан бері жобаларға 1 359,1 млрд. теңге жалпы сомасына қолдау көрсетілді. 2013 – 2015 жылдар мен 2016 жылдың 1-тоқсаны ішінде 70 937 жұмыс орны құрылды, 438,5 млрд. теңге сомасына салық төленді, 5 315,8 млрд. теңге сомасына өнім шығару қамтамасыз етілді.

ИНВЕСТИЦИЯЛЫҚ САЯСАТ. Холдингтің еншілес компаниясы «Қазақстанның Даму Банкі» АҚ 2013 – 2015 жылдар кезеңінде жалпы құны 855 млрд. теңге 31 жобаны қаржыландыруға мақұлдады, бұл ретте ҚДБ-дан тартылған қарыз сомасы 580 млрд. теңге мөлшерінде болды.

ИННОВАЦИЯЛАРДЫ ҚОЛДАУ. Холдинг еншілес компаниясы «Технологиялық даму жөніндегі ұлттық агенттік» АҚ арқылы 3,1 млрд. теңге сомасына 9 грант түрі бойынша 135 инновациялық жобаларды қаржыландыруды қамтамасыз етті (технологияларды сатып алуға және ауыл шаруашылығы дақылдарының барлық түрі үшін тыңайтқыштар өндіру, спутниктер үшін күн құрылғыларын өндіру, инновациялық модульдерді жинақтау жобаларын қамтамасыз етуге). Кәсіпорындар 57,4 млрд. теңгеге өнім шығарды, 2,2 млрд. теңге сомасына салық төледі, 800 жұмыс орнын ашты.

«БӘСЕКЕГЕ ҚАБІЛЕТТІ КӨШБАСШЫЛАР – ҰЛТТЫҚ ЧЕМПИОНДАР». ҚР Президенті Нұрсұлтан Назарбаевтың 5 институционалдық реформасын жүзеге асыру жөніндегі «100 нақты қадам» Ұлт жоспарына сәйкес «Бәйтерек» холдингі отандық көшбасшы компанияларды кешенді қолдау жолымен экономиканы дамыту мен әртараптандыруға бағытталған «Бәсекеге қабілетті көшбасшылар – ұлттық чемпиондар» бағдарламасын іске асырады.

Бағдарламаға 27 компания қатысуда. Соның ішінде 16 компания тамақ өнеркәсібі саласында, 6 – машина жасау саласында, 5-еуі – құрылыс материалдарының өндірісінде жұмыс істейді. Қаржылық өтінімдер 53 млрд. теңгеге мақұлданды. 2018 жылы күтілетін нәтиже: бағдарламаға қатысушы компаниялары табысының өсімі 170 млрд. теңге, 4 600 жаңа тұрақты жұмыс орындарын құру.