Тәуелсіздік күні қарсаңында қоныс тойын атап өтіп жатқан тұрғындарды Павлодар облысының әкімі Болат Бақауов пен Тұрғын үй құрылыс жинақ банкі («Бәйтерек» холдингінің еншілес ұйымы) басқарма төрайымының орынбасары Нұрлан Ақшанов құттықтады.
Жаңа тұрғын үйлер «Нұрлы жер» мемлекеттік бағдарламасының аясында салынған. 1 шаршы метрінің бағасы – 120 000 теңге. Пәтерлер аумағы 40 пен 84 ш.м аралығында. Баспаналы болу үшін клиенттердің Тұрғын үй құрылыс жинақ банкіндегі шотында үй құнының 20%-на тең бастапқы жарнаның болуы жеткілікті болды. Мәселен, таза әрлеудегі бір бөлмелі және бағасы 5 миллион теңге болатын пәтерді сатып алу үшін үміткерлер шоттарына 1 миллион теңге қаражат салды. Осыдан кейін Тұрғын үй құрылыс жинақ банкі оларға жылдық мөлшерлемесі 5% болатын заем ұсынып, баспана иесі атануға көмектесті.

- Үйлі болып жатқан тұрғындар пәтер сатып алу үшін жоғары жалақы алудың міндетті емес екенін істерімен көрсетіп отыр. Ол үшін тұрақты орташа табыс және қаражат жинай алу қабілеті жеткілікті. Ал «Нұрлы жер» мемлекеттік бағдарламасы мен Тұрғын үй құрылыс жинақ банкі қолдау көрсетеді. Бұған осы бағдарламаның аясында 2018 жылы баспанаға қол жеткізген 8 000-нан астам қазақстандықтың тәжірибесі дәлел. Павлодардағы бұл игілікті іс бүгінгі шарамен тоқтап қалмайды. Қосымша тағы 650 пәтер бойынша тұрғын үй сатып алушылар пулына іріктеу жарияланады, - деп түсіндіріп өтті Нұрлан Ақшанов.

Мемлекеттік бағдарлама үйлері жеңілдетілген шарттармен берілетіндіктен, үміткерлерге қойылатын белгілі бір талаптар бар. Ол:
- ҚР азаматы немесе оралман мәртебесіне ие болуы.
- өтініш берушіде және оның отбасы мүшелерінде соңғы 5 жыл ішінде Қазақстан Республикасының аумағында жеке меншік үйінің болмауы.
- тіркеуде тұру.
- төлем қабілеттілігін растай алуы.

Павлодар облысындағы Тұрғын үй құрылыс жинақ банкі салымшылары мемлекетті бағдарламадан бөлек «Өз үйім» бағдарламасы бойынша баспана алады. Таза әрлеудегі үйлердің бір шаршы метрі бағасы 140 000-165 000 теңге аралығында. Жалпы алғанда 2019 жылдың наурыз айында екі нысан бойынша 216 пәтер пайдалануға беріледі деп жоспарлануда.

«Өз үйім» бағдарламасына қатысу арқылы аталған пәтерлерді Тұрғын үй құрылыс жинақ банкінің кез келген клиенті сатып ала алады. Бұл – бағдарламаның артықшылығы. Салымшының атында тұрғын үй болу-болмау керектігі туралы ешқандай талап қойылмайды.

«Нұрлы жер» және «Өз үйім» бағдарламалр аясында салынып жатқан барлық нысандар туралы ақпаратты baspana.kz порталынан, сондай-ақ ЖССБ24 интернет-банкингіндегі жеке кабинет пен банк филиалының әлеуметтік желілердегі парақшаларынан білуге болады.

Қазіргі уақытта Павлодар облысының әрбір 13-тұрғыны, яғни 55 000 адам Тұрғын үй құрылыс жинақ банкінде баспаналы боламыз деп ақша жинап жатыр. Жыл басынан бері Павлодар облыстық филиалының қызметкерлері 2,5 мыңнан астам заем берді.