16 мамыр күні Ақтөбе облысында аймақ басшысы Бердібек Сапарбаев және Тұрғын үй құрылыс жинақ банкінің Басқарма Төрағасы Айбатыр Жұмағұлов тұрғын үй құрылысы саласындағы бірлескен қызмет туралы меморандумға қол қойды.

Осылайша, Ақтөбе қаласы тұрғын үй құрылыс кластері бойынша өңірлер арасында көшбасшылардың біріне айналды. Облыс әкімі Бердібек Сапарбаев бұған дейін де құрылысшылардың, құрылыс материалдарын өндірушілердің және жобалаушылардың күштерін біріктіре отырып, аймақтағы тұрғын үй құрылыс жинақ жүйесінің бар мүмкіндігін пайдалануға шақырған еді.

Тұрғын үй құрылыс жинақ банкі мен өңірлік Кәсіпкерлер палатасы арасында қол қойылған меморандумның маңызы зор. Мұны Ақтөбе облысы әкімдігінің бірегей шешімі десе де болады. Бұл өңірдің құрылыс саласында 1400-ге тарта түрлі компания жұмыс істейді екен. Ауыз толтырып айта кетерлік жайт, Ақтөбеде сатылымдағы барлық құрылыс материалдарының 70 пайызы – жергілікті жердің өнімі. Ал кластер бағасы нарықтан едәуір төмен әрі сапалы тұрғын үй салуға мүмкіндік беріп отыр. Өз кезегінде, Тұрғын үй құрылыс жинақ банкінің басшысы Айбатыр Жұмағұлов облыс әкімі Бердібек Сапарбаевқа ақтөбелік салымшыларды қолжетімді тұрғын үйлермен қамтамасыз ету мақсатымен уақтылы және оңтайлы бастама көтергені үшін алғыс білдірді.
Өңір басшысының сөзіне қарағанда, соңғы бес жылдың ішінде Ақтөбе облысында 2,3 миллион шаршы метр тұрғын үй пайдалануға беріліп, жалпы, тұрғын үй құрылысына 162 миллиард теңге инвестиция тартылыпты. Қазір Өңірлерді дамытудың 2020 жылға дейінгі мемлекеттік бағдарлама аясында қолжетімді тұрғын үй салу тұрғысынан, бұл облыс Алматы мен Астана қалаларынан кейінгі үшінші орынды иемденіп отыр.

Соңғы жылдары Тұрғын үй құрылыс жинақ банкінің қатысумен 290 мың шаршы метр тұрғын үй салынған. Ақтөбедегі банк клиенттердің саны осы уақыт ішінде 17 мың адамнан 45 мың адамға дейін артты. Демек, бұл – Банк клиенттері жыл сайын 15 мың адамға көбейіп келеді деген сөз. Сонымен қатар облыс прокуратурасы, ІІД және ТЖД басшылығымен аталған ведомстволардың қызметкерлеріне арнап әлеуметтік тұрғын үйлер салу жөніндегі меморандумдарға қол қойылды.

Жергілікті құрылыс салушылардың дені осы Меморандумға қол қоюға шақырылды. ҚТҚЖБ Басқарма төрағасы Айбатыр Жұмағұлов оларды банк салымшылары үшін де тұрғын үй құрылысын салуға шақырды.

Дәл осы күні Бердібек Сапарбаев пен Айбатыр Жұмағұлов тұрғындарға «Нұр Ақтөбе» ықшамауданындағы жаңа үйдің 540 пәтер кілтін табыстау салтанатты шарасына қатысты. Мұнда Өңірлерді дамытудың 2020 жылға дейінгі бағдарламасы бойынша 1 шаршы метрінің құны 100 мың теңге тұратын үш жаңа үй салынған. Бұл үйлерде 2016 жылдың соңына дейін қоныс тойын әлі 540 ақтөбелік отбасы тойлайтын болады.