Отбасы банкінде "Наурыз 2025" бағдарламасы бойынша алғашқы заем берілді

Биылғы жылы "Наурыз" бағдарламасы бойынша алғашқы қолжетімді несиені Батыс Қазақстан облысының 26 жастағы тұрғыны Бексұлтан Қазиуллин ресімдеді. Ол жедел медициналық жәрдем станциясында фельдшер болып жұмыс істейді. Облыс тұрғыны Оралда бастапқы нарықтан онлайн-ипотека арқылы пәтер сатып алды.

Бүгінгі таңда банк "Наурыз" бағдарламасы бойынша барлығы 1 047 кредиттік өтінімді мақұлдады. Бұл ретте қазақстандықтар қарыздарды ресімдеп қана қоймай, Отбасы банкіне ("Бәйтерек" холдингінің еншілес ұйымы) қашықтан кредиттік өтінімдер беруді ыңғайлы көреді. Ол үшін hcsbk.kz ресми сайтында немесе Баспана маркетте otbasybank.kz бейне қоңырауға тапсырыс беру керек. Осылайша бағдарлама қатысушыларының 36% несиелік өтінімді қашықтықтан беру арнасын пайдаланып үлгерген.

12 000 қазақстандықтың "Наурыз" бағдарламасына өткені туралы жаңалықты Отбасы банк 2025 жылдың 9 сәуірінде хабарлаған болатын.

Өтініш берушілер мен тұрғын үй бағдарламасына қатысушылардың толық тізімі банктің ресми сайтында жарияланған. Бұл қатысушыларды іріктеу үрдісінің ашықтығын көрсету үшін жасалады. Өтінімдерді қабылдау және қатысушылар тізімін қалыптастыру кезіндегі барлық процесс банк қызметкерлерінің қатысуынсыз автоматты режимде жүреді.

Банк жүйесі барлығы 34 745 өтінім өңдеді. Әрбір үшінші өтінім қатысушылар тізіміне енді. Биылғы жылы ең төменгі балл 104,78 болды. Ең жоғары балл 1421,29 болды.

Алматы тұрғыны Дилярам Амитахунова ең көп ұпай жинады. Тұрғын үй мәселесін шешу үшін ол студент кезінде Отбасы банкінде депозит ашқан. Бұл 2013 жылы болды. Содан бері алматылық шотта жоспарлы жинақ жасады. Осы жылдар ішінде жинақталған депозиттік сыйақы оған ең жоғары ұпай жинауға көмектесті. Дилярамның қатысушылар тізіміне енгені және ең көп ұпай жинағаны туралы жаңалықты ол жол үстінде естіген. Оның өміріндегі маңызды оқиға туралы банк менеджерлері хабарлады.

- Отбасы банк – бұл шын мәнінде отбасылық банк. Ол өз рөлін толық орындайды деп санаймын. Мен анамын, қызымды тәрбиелеп жатырмын және мен үшін оның болашағы туралы ойлау маңызды. Сондықтан мен осы банкті таңдап, депозитке ақша жинадым. Көпжылдық клиент ретінде мен аталмыш қаржы құрылымының қызметкерлеріне тұрғын үй бағдарламаларына қатысуға және тұрғын үй мәселесін шешуге мүмкіндік бергені үшін алғыс айтамын. Баспана таңдауға Баспана маркет порталы өте ыңғайлы. Онда сіз тек Алматыда ғана емес, сонымен қатар құны мен орналасқан жері бойынша қолайлы басқа аймақта пәтер таңдай аласыз. Бұл үлкен жетістік, банк өз клиенттеріне ыңғайлы болу үшін бәрін жасаған, - деп атап өтті Банк салымшысы Дилярам Амитахунова.

"Наурыз" бағдарламасына қатысушылардың тізіміне енген 12 000 қазақстандықтың 4 577-сі немесе 38,1% тұрғын үйге кезекте тұр. Олардың жартысына жуығы (16,8%) халықтың әлеуметтік осал санатына жатады.

Бағдарламаға қатысушылардың көпшілігі Республикалық маңызы бар – Астана, Алматы және Шымкент қалаларында тұрады. Бұл 7880 адам. Облыстық маңызы бар қалалардан бағдарламаға 3 506 адам кірді, тағы 560 банк клиенті аудандарда және 54 салымшы моноқалаларда тұрады.

Қатысушылардың басым бөлігі немесе 7 112 адам - 35 жасқа дейінгі (қоса алғанда) жас қазақстандықтар. Олар әдетте үйленген және балалары бар.

"Наурыз 2025" бағдарламасына қатысушылар пулында 25% - тұрғын үй төлемдерін алушылар, яғни әскери қызметшілер мен арнаулы мемлекеттік органдардың қызметкерлері.

Жалпы, ағымдағы өтінімдерді қабылдау көрсеткендей, "Наурыз 2025" бағдарламасына қатысқан қазақстандықтар алдын ала және саналы түрде дайындалған, жинақ шоттарын белсенді толықтырған, депозит бойынша сыйақы жинағанын көрсетті. Өйткені, ол үшін ең көп ұпай беріледі.

Отбасы банк тұрғын үй құрылыс жинақ жүйесін іске асыратындықтан, яғни қазақстандықтарды қолжетімді шарттар бойынша тұрғын үй сатып алу үшін үнемдеуге үйретеді, балдарды есептеу кезінде жинақтауға баса назар аударылады. Ең үнемшіл салымшылардың "Наурыз" бағдарламасына қатысушылардың тізіміне ену мүмкіндігі жоғары.

Ұпайлар қалай есептеледі?

- салым бойынша сыйақы мөлшері - әрбір 1 000 теңге үшін 1 ұпай;

- тіркелген некенің болуы - 5 ұпай;

- балалардың болуы - 10 ұпай (балалар санына қарамастан);

- халықтың әлеуметтік осал топтары (ХӘОТ) мәртебесінің болуы - 10 ұпай;

- 35 жасқа дейінгі жас (қоса алғанда) – 5 ұпай.

Мысалы, 1000 балл жинау үшін салым бойынша сыйақы түрінде Отбасы банкіндегі депозитте 1 млн теңге жинау қажет. Банктегі сыйақы капиталдандырылады, яғни есептелген сыйақыға сыйақы да есептеледі. Сыйақы мөлшері - жылдық 2% (мемлекеттік сыйлықақыны ескере отырып, ЖТСМ 2,4%-дан 14%-ға дейін). Депозитте 1 млн теңге көлемінде сыйақы жинақтау үшін кемінде 5 жыл ішінде 10 миллион теңге жоспарлы түрде жинақтау қажет.

Банк биылғы жылы қандай балл ең жоғары және ең төменгі балл болатынын нақты анықтамайтынын ескеру маңызды. Банктің автоматты жүйесі ұпайларды үлкен мәннен кішіге дейін бағалайды. Биылғы жылы ең жоғары балл 1 421,29, өткен жылы 1 032,44 құрады.

2026 жылы "Наурыз" бағдарламасына өту мүмкіндігін қалай арттыруға болады? Отбасы банк кеңестері:

1. "Отбасылық пакет" аясында үнемдеңіз. Бұл кезде бүкіл отбасы үй сатып алуға қаражат жинайды. Яғни, отбасының әрбір мүшесі өзіне депозит ашады, оны жоспарлы түрде толықтырады, ал өтінім берер алдында шоттар бір депозитке біріктіріледі.

2. Депозитті үнемі толтыру маңызды! Оны бір ай ішінде бірнеше рет толтыруға тырысыңыз, қаржылық мүмкіндік пайда болған сайын, бір ай ішінде бір реттік толықтырумен шектелмеңіз.

3. Депозитті зейнетақы профицитімен толықтырыңыз. Зейнетақы шотының жай-күйін мезгіл-мезгіл тексеріп отырыңыз. Шотта жеткіліктілік шегінен жоғары сома болуы мүмкін. Оны депозитті толықтыруға бағыттауға болады.