«Алматы жастары» бағдарламасы аясында биыл 1100 жас алматылық баспаналы болады

«Алматы жастары» бағдарламасына өтініштерді қабылдау 15 мамырда басталып, 31 мамырға дейін жалғасады. Тұрғын үй бағдарламасының әлеуетті қатысушылары almaty-zhastary.kz сайтында онлайн өтініш бере алады. Ол үшін үміткерлерге ЭЦҚ қажет.

Алматы әкімдігі мен Отбасы банкінің бірлескен жобасына 35 жасқа дейінгі/толған алматылықтар қатыса алады. Өтініштер Алматы қаласындағы мемлекеттік республикалық және қалалық ұйымдарда жұмыс істейтін азаматтардың келесі санаттарынан қабылданады:

Үміткерлердің ресми жұмыс өтілі Алматы қаласында соңғы жарты жылдан кем болмауы тиіс.

Сондай-ақ, бағдарлама қатысушысы және оның отбасы мүшелері соңғы 5 жыл ішінде жылжымайтын мүлікке ие болмауы тиіс.

- «Алматы жастары» бағдарламасы 2017 жылы басталған болатын. Қазіргі таңда қаланың жас тұрғындары арасында өте танымал. Осы уақыт аралығында біз қала басшылығымен бірлесіп 3 393 жас азаматты 52,5 млрд теңгеге баспанамен қамтамасыз еттік. Биыл бағдарламаны жүзеге асыруға 20 млрд теңге бөлінді, оның 17 млрд теңгесі қалалық бюджеттен, 3 млрд теңгесі Отбасы банкінен. Бұл қаражат 1100 алматылық тұрғынның баспана мәселесін шешуге мүмкіндік береді», - деп түсіндірді «Отбасы Банкі» АҚ Алматы қалалық филиалы директорының орынбасары Элизада Туретаева.

Аlmaty-zhastary.kz сайтында өтініштерді қабылдау аяқталғаннан кейін Алматы қаласы тұрғын үй саясаты басқармасы үміткерлердің жиналған ұпайлары бойынша қатысушыларды іріктейді. Ұпай санына некеге тұрған жылдары, балаларының болуы, кәсібі бойынша үздіксіз еңбек өтілінің ұзақтығы, халықтың әлеуметтік осал топтарына жатуы әсер ететін болады.

Үміткер тізімі құрылғаннан кейін олардың барлығы төлем қабілеттілігін растау үшін Отбасы банкіне жолдама алады. Банк қатысушыға заем алу туралы оң шешім шыққан күннен бастап баспана іздеуге 45 күнтізбелік күн уақыт береді. Пәтерді Алматы қаласындағы алғашқы немесе екінші нарықтардан, сондай-ақ «Қазақстан тұрғын үй компаниясы» АҚ кепілдігі бар нысандардан сатып алуға болады.

Отбасы банк тұрғын үйін сатып алуға 18 млн теңгеге дейін заем бере алады (егер мүліктің құны 18 млн теңгеден жоғары болса, онда айырмашылықты қатысушы өз қаражаты есебінен төлей алады). Алғашқы жарна кемінде 10% болуы керек. Несие бойынша сыйақы мөлшерлемесі 5% (ЖТСМ 5,2%) болады. Несиені 25 жылға дейін алуға болады.

Сондай-ақ 10 мамырда «Ұмай» бағдарламасы бойынша өтініштерді қабылдау басталады. Бұл Отбасы банкі мен Азия даму банкінің бірлескен жобасы.

«Ұмай» бағдарламасы бойынша сатып алынатын баспананың ең жоғарғы құны 30 млн теңгеден аспауы тиіс. Сыйақы мөлшерлемесі биылғы жылы 14,4% (ЖТСМ – 15,4% бастап) кейіннен 3,5%-дан 5%-ға (ЖТСМ 3,6% бастап) төмендейді.

«Ұмай» ипотекасы бойынша несие мерзімі – 25 жылға дейін. Бұл ретте баспана таңдауда ешқандай шектеулер жоқ, оны алғашқы немесе екінші нарықтан, соның ішінде үлестік қатысу келісімі бойынша сатып алуға болады. Сондай-ақ «Ұмай» бағдарламасы бойынша 3,7 млн теңгеге дейінгі несиені жөндеу жұмыстарына алуға болады.

Егер әлеуетті қарыз алушының отбасылық табысы 550 000 теңгеден аспаса, онда ол «Ұмай» бағдарламасы бойынша несиені 15%-дық бастапқы жарнамен ала алады. Егер отбасылық кіріс 550 001 теңгеден 640 000 теңгеге дейін болса, онда несиені 20%-дық бастапқы жарнамен алуға болады.

«Ұмай» бағдарламасы бойынша өтініштерді otbasybank.kz порталына онлайн немесе банк бөлімшелері мен кеңес беру орталықтары арқылы жолдауға болады. 

***

««Отбасы банк» тұрғын үй құрылыс жинақ банкi» АҚ — еліміздегі тұрғын үй құрылыс жинақ жүйесін жүзеге асыратын бірден-бір банк. Ұйым Еуропалық құрылыс жинақ кассалары федерациясына (ЕҚЖКФ) және Халықаралық тұрғын үйді қаржыландыру одағына кіреді. Банкінің жалғыз акционері – «Бәйтерек» Ұлттық басқарушы холдингі» АҚ.