Қаныш Тулеушин «Даму» қорының басшысы болып тағайындалды

«Бәйтерек» ұлттық басқарушы холдингінің еншілес ұйымы «Даму» кәсіпкерлікті дамыту қорында Басқарма Төрағасы ауысты. Осылайша, 1 ақпанда Қазақстан Республикасының Премьер-Министрі Кәрім Мәсімовтың төрағалығымен өткен отырыста қабылданған Холдингтің Директорлар кеңесі шешімімен «Бәйтерек» холдингінің басқарушы директоры – басқарма мүшесі Қаныш Тулеушиннің өкілеттіктері тоқтатылды. «Бәйтерек» холдингі Басқармасының шешімімен ол «Даму» қорының Басқарма Төрағасы қызметіне тағайындалды.  

Бұған дейін «Даму» қорын басқарған Ләззат Ибрагимова «Бәйтерек» холдингі Басқарма Төрағасының орынбасары қызметіне ауыстырылды.  

Қаныш Тулеушин «Болашақ» бағдарламасының түлегі болып табылады. 2006 жылы Оксфорд Университетін (Оксфорд, Ұлыбритания) үздік тәмамдап, инновациялық менеджменттің магистрі атанды. Сондай-ақ, қаржы және кредит мамандығы бойынша Еуразия ұлттық университетінің қызыл дипломын алды.  

Өз еңбек жолын 2004 жылы «Темірбанк» АҚ-да бухгалтер-операционист қызметінен бастады. Кейіннен сол банкте есептеу-кассалық бөлімнің бастығы болып тағайындалды. Әр жылдары «Ұлттық ғылыми-техникалық ақпарат орталығы» АҚ-да консультант, «Сауда саясатын дамыту орталығы» АҚ-да бас сарапшы қызметтерін атқарды. 2007 жылы Қазақстан Республикасы Индустрия және сауда министрлігінде Инновациялық саясат басқармасын басқарды. 2008 – 2011 жылдары Қазақстан Республикасы Президентінің Әкімшілігінде еңбек етті. 2011 жылы Қазақстан Республикасы Индустрия және жаңа технологиялар вице-министрі болып тағайындалды. 2013 жылдан бастап «Бәйтерек» холдингінің басқарушы директоры – басқарма мүшесі болып жұмыс істеді.  

Әр жылдары Сингапур Ұлттық университетінің Ли Куан Ю атындағы Мемлекеттік саясат мектебімен бірлесіп, Назарбаев университетінің Жоғары мемлекеттік саясат мектебінде «Мемлекеттік саясат және басқару» тақырыбы бойынша оқу мен тренингтер, ЮНИДО тренингі, Австрияда «Өңдеу өнеркәсібінің болашағы» тақырыбы бойынша тренинг, «Ernst&Young» бизнес мектебінің қаржылық үлгілеу,  бизнесті бағалау, МВА, қаржылық талдау мен инвестициялық жобаларды бағалау тақырыптары бойынша тренингтерден өтті.